दोलखामा पनि आइपुग्यो कोरोनाको खोप, बुधवार देखि लगाउन सुरु

दर्पण संवाददाता
चरीकोट, १३ माघ
नेपाल सरकारलाई भारतले उपलब्ध गराएको कोरोना भाइरसको खोप स्वास्थ्य तथा जनसंख्या मन्त्रालय तथा स्वास्थ्य सेवा विभाग मार्फत दोलखामा पनि आई पुगेको छ ।

जिल्लामा वागमती प्रदेश अन्र्तगत स्वास्थ्य सेवा विभागले पठाएको २ हजार २ सय ७० डोज खोप आज विहान जिल्लामा आईपुगेको स्वास्थ्य कार्यालय दोलखाका प्रमुख विभु कुमार झाले बताउनुभयो । जिल्लामा प्राप्त खोप स्वास्थ्य कर्मी, सवारी चालक, सुरक्षाकर्मी संचारकर्मी तथा अग्रपंतीमा काम गनेहरुका लागि पहिलो चरणमा चरिकोट अस्पतालबाट २ हजार १ सय ४० जनालाई र जिरी अस्पतालबाट चार सय जनालाई लगाउने तयारी गरिएको छ । सात गाउँपालिका र दुई नगरपालिका रहेको दोलखामा भिमेश्वर नगरपालिकाको चरिकोट अस्पताल र जिरी नगरपालिकाको जिरी अस्पतालबाट मात्र खोप लगाउन सकिने व्यवस्था मिलाइएको छ । बुधबार देखि चरिकोट अस्पतालमा सुरु गरिने खोपमा ७ सय ७७ जना स्वास्थ्यकर्मी, १ हजार २ सय ५५ जना महिला स्वास्थ्य स्वयमसेवीका, ५६ जना सुरक्षाकर्मी, ५२ जना सरसफाइकर्मी तथा सवारी चालकहरुलाई निशुल्क खोप लगाउने तयारी गरिएको कार्यालय प्रमुख झाले बताउनुभयो । जिल्लाका दुवै अस्पतालमा खोप तालिम लिएका स्वास्थ्यकर्मीहरुले चिकित्सकको प्रत्यक्ष निगरानीमा खोप लगाइने र पहिलो डोज लगाई सकेकाहरुलाई एक महिना पछि पुन दोस्रो डोजको लगाईने जनाइएको छ । गर्भवती सुत्केरी, वच्चालाई दुध चुसाई रहेका र १८ वर्ष भन्दा कम उमेरका व्यक्तिहरुलाई खोप नलगाइने स्वास्थ्य कार्यालय दोलखाले जनाएको छ