दर्पण संवाददाता
चरिकोट, भाद्र १२, माथिल्लो तामाकोशी जलबिद्युत आयोजनाको शयेर आवेदन संकलनको लागि समय थप गर्न जिल्ला समन्वय समिति दोलखाले आग्रह गरेको छ ।
समन्वय समितिले शयेर आवेदन गर्नको लागि सात दिनको समय थप गर्न आग्रह गरे संगै माथिल्लो तामाकोशी जलबिद्युत आयोजनाले धितो पत्र बोर्डलाई अनुरोध गरेको छ । एक साताको लागि शयेर आवेदन थप गर्न धितोपत्र बोर्डलाई पत्रचार गरिएको माथिल्लो तामाकोशी जलबिद्युत आयोजनाका प्रवक्ता डा. गनेश न्यौपानेले बताउनु भयो ।
आयोजना प्रभावित स्थानिय दोलखा जिल्ला बासीको लागि आयोजनाको १० प्रतिशत शयेर साउन १६ गते देखि भाद्र १४ गते सम्मका लागि खुल्ला गरिएको थियो । शयेर हाल्नको लागि धेरै नागरिक बाँकी देखिएको र वैकहरुमा चाप अहिले पनि अत्यधिक देखिएको हुँदा अब दुई दिन मात्र बाँकी रहेको र सो समय पर्याप्त नभएको हुँदा समय थप गर्नको लागि आग्रह गरिएको समन्वय प्रमुख डवल पाण्डेले बताउनु भयो । आग्रह बमोजिम धितोपत्र बोर्डले एक साताको समय थप गरेमा साउन २१ गते सम्म शयेर आवेदन गर्न पाउने छन् ।
हालसम्म १ लाख ५६ हजार दोलखा जिल्लाबासिले सेयरका लागि आवेदन दिएका छन् । उक्त आवेदनबाट २ अर्ब ६४ करोड बराबरको शेयर संकलन भएको छ ।
धितोपत्र बोर्डले सम्भवतः आयोजनाको आग्रह बमोजिम एक साताको म्याद थप्ने सम्भावना छ । आयोजनाले दोलखा जिल्लावासीका लागि ३० कित्ता देखि अधिकतम तीन सय कित्ताको सिमा राखेर १ अर्व ५ करोड ९० लाख बराबरको सेयर जारी गरेको छ ।